នារសៀលថ្ងៃទី២៧ ខែតុលា ឆ្នាំ២០២៣ លោកជំទាវ ឃួន ឃុនឌី សមាជិកាគណៈកម្មការទី៥ ព្រឹទ្ធសភា និងជាសមាជិកាព្រឹទ្ធសភាប្រចាំភូមិភាគទី៨ និងឯកឧត្តម សួស យ៉ារ៉ា អ្នកតំណាងរាស្ត្រមណ្ឌលខេត្តកំពង់ធំ និងជាប្រធានគណៈកម្មការទី៥ រដ្ឋសភា បានអញ្ជើញជួបសំណេះសំណាលជាមួយនឹងកីឡាករទូកងសរុបចំនួន១១ទូក ខ្នាតអន្តរជាតិ ដើម្បីត្រៀមលក្ខណៈប្រណាំងទូកង ដែលនឹងប្រារព្ធធ្វើចាប់ថ្ងៃស្អែកទី២៨ ដល់ថ្ងៃទី២៩ ខែតុលា ឆ្នាំ២០២៣ នៅតាមដងស្ទឹងសែន ក្រុងស្ទឹងសែន ខេត្តកំពង់ធំ ដែលមានសមាជិកចូលរួមសរុបចំនួន២៥២នាក់។ នៅក្នុងឱកាសជួបសំណេះសំណាលនោះ លោកជំទាវ និងឯកឧត្តម បានឧបត្ថម្ភនូវគ្រឿងឧបភោគ បរិភោគ និងថវិកាមួយចំនួនដល់កីឡាករទូកងទាំង១១ទូក។ បន្ទាប់មកនៅរសៀលថ្ងៃខែឆ្នាំដដែល លោកជំទាវ និងឯកឧត្តម បានបន្តជួបសំណេះសំណាលជាមួយនឹងអាណាព្យាបាលសិស្សានុសិស្ស និងសិស្សានុសិស្សដែលមានជីវភាពខ្វះខាតសរុបចំនួន៥៤នាក់ សម្រាប់ត្រៀមប្រឡងយកសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅចាប់ពីថ្ងៃទី៦ ដល់ថ្ងៃទី៧ ខែវិច្ឆិកា ឆ្នាំ២០២៣ នាពេលខាងមុខនេះ។ នៅក្នុងឱកាសជួបសំណេះសំណាលនោះ លោកជំទាវ និងឯកឧត្តម បានឧបត្ថម្ភនូវសម្ភារសិក្សា និងថវិការមួយចំនួន នៅសាលាស្រុកកំពង់ស្វាយ ខេត្តកំពង់ធំ។
